Wie zin de 2Pees ontstange?
't Idee veur 2Pees is ontstange nao ’t jètste leedjeskonkoer in Aelse (eind 1999). Deilname waor dao van Ivo v.d. Bijl, Escolum en Patronaatsknöppele allemaol gevestige namen. Pierre en Peter dachtte toen, dat d’r waal gèt plaats waor veur vernuujing en om te sjöppe taege de gevestigde orde (dat is tenslotte woo vasteloavend om dreijt) en dat d’r ruimte waor veur ein duo dat gaer gaar gein verstèndj van mèziek haet. Peter wirkte ’t idee tiejens de zomer vekansie van 2000 oet en schreef de jètste tèks veur ein leedje. Nao toeskoms woor Pierre oetgenwèddig en de teks veurgelag. Pierre hauw ’t allemaol nog neet zwa serieus genomme en waor jèl verras toen Peter mit de tèks kaom en kreeg al weike kneeje bie ‘t idee dat hae de bühne op môs. Pierre waor hievan zwa onger de indruk, dat hae op ein oer tied mèsjien waal 15 kjèr nao de WC is gegange. Hae twiefelde jèl èrg mae nao gèt euvertuugende weurd van Peter en ein paar cola bacardi (de hoesdrank van de 2Pees) ging hae euverstag en zag toe mit te doon.
Mit behulp van eine cassetterecorder oet de jaore 80, geljaend van sjwanzöster Dorine, woor gepoog om ein melodie te vènge bie de tèks. Hie zin helaas gein beelde of geluidsopnames van, mae veer kènne uch zèkke dat dit hilarische taferele woare en dat de hoesgenoote waeke langk mit wètjes in de wharre höbbe rondjgeloupe. Ze kaome d'r dan auch neet ech oet en gingen op zeuk nao professionele hulp
Jürgen Daemen woort gecharterd om de mèziek te schrieve en ’t leedje “Veer höbbe doosj” waor ei feit. Dit woor de jètste kjèr ten gewhèrre gebrach op ’t Aelser leedjeskonkour van 2000. Onger begeleiding van eine mèziekbèndj opgenomme mit 't (kirk)urgel van Jürgen’t woor 't leedje live gezonge, mae aangezin Peter en Pierre totaal gein geveul veur mèziek hauwe woor d’r flink naeve gezonge! Volges Jürgen zonge ze de 2e stjöm! Hie zin nog geluids opnames van veur de liefhebbers, mae allein op cassette-bèndjes. ’t Optraeje waor dan auch neet zwa succesvol bie de vakjury. Echter bie ’t publiek sloog de melodie en de karnavaleske performance waal aan en de vraog nao ein CD waor grwaot. Peter en Pierre zaote mit de hènj in ‘t (toen nog weelderige) haor en wistte neet wat te doon. Jürgen Daemen brach oetkoms en vertèlde hun euver ein studio in Stein woo ste leedjes opnumme kos en woo eine touvenaer zaot dae van de laelikste stjumme nog gèt wherbaars maake kos. Mae dao zaot natuurlik waal ei kosteplaetje aan. Juwelier Ricardo oet Baek zaog waal gèt in ’t idee en waor bereid de opnamekoste te betaale. Resultaat: de jètste CD kaom oet en waor al direk ein mit ei gouwe rèndje.
De gebaorte van de 2Pees waor ein feit!